ఈగ

ఈగ కథ చదవగానే ఈగ ఏంటి, పగ తీర్చుకోడం ఏంటి అనుకున్నాను...అయితే డైరెక్టర్ రాజమౌళి కాబట్టి చూసి తీరాల్సిన సినిమా అనుకున్నాను..అతను కాకుండా వేరే డైరెక్టర్ అయి వుండి, ఈ కథ ముందే తెలిస్తే చూసేదాన్ని కాదేమో..

సినిమా అవుట్ n అవుట్ entertainer ...ఎక్కడా బోర్ కొట్టలేదు..లిమిటెడ్ characters తో, అనవసరమయిన సీన్ ఒక్కటి కూడా లేకుండా సినిమా ఆద్యంతం వినోదభరితంగా సాగుతుంది..ఈగ హావభావాలు, డాన్సు లు చెయ్యడం ఇవన్నీ చాలా ఆకట్టుకుంటాయి..నటీనటుల విషయానికొస్తే ఉన్న నాలుగు (నాని, సమంత,సుదీప్, ఈగ) ముఖ్య పాత్రల్లో బాగా నచ్చింది సుదీప్ నటన..నటించలేదు, జీవించేసాడు అనాలేమో..నాని వున్నది కొద్ది సేపే అయినా కూడా బాగా చేసాడు..అతను చనిపోగానే అప్పుడే అయిపోయిందా ఇతని రోల్ అనిపించి బాధేస్తుంది..కానీ వెంటనే ఈగ లా పుట్టడం తో మళ్ళీ సినిమా లో లీనమయిపోతాము..ఈగ కి dialogues పెట్టకుండా మంచి పని చేసారు..అవి వుంటే సినిమా మరోలా వుండేది, ఈగ హీరో అయ్యేది కాదేమో...ఈగ ని ఈగ లానే చూపించడం బాగుంది..సమంత కూడా బావుంది...చివర్లో ఈగ మీద చేసిన టైటిల్ సాంగ్ భలే నచ్చేసింది నాకు..



ఈ సినిమా కథ చెప్పేటప్పుడు నాని ఈగ రూపం లో పుట్టి సుదీప్ మీద పగ తీర్చుకుంటాడు అని అనడం విన్నాను కానీ సినిమా చూసాక ఈగ పగ తీర్చుకుంది అనడం కంటే తన ప్రేయసి ని విలన్ బారి నుండి కాపాడుకుంది అనడం కరెక్ట్ అనిపించింది నాకు.

రాజమౌళి ఏదో ఒక జిమ్మిక్ చేసి సినిమా ని హిట్ చేసేస్తాడు అన్న మాట మరో సారి prove అయింది..theatre లో మాత్రమే చూడాల్సిన సినిమా ఇది...

గబ్బర్ సింగ్

పవన్ కళ్యాణ్ సినిమాల్లో వుండే కామెడీ, melodious మ్యూజిక్ నాకు చాలా నచ్చుతాయి. ముఖ్యంగా ద్వందార్ధాలు ఉపయోగించకుండా రాసే పాటలు మరీ మరీ ఇష్టం. ఈ సినిమా హిట్ అవాలని చాలా చాలా కోరుకున్నాను..పవన్ కళ్యాణ్ అంటే ఏదో మూల ఇష్టం వుంది నాకు, పైగా శ్రుతి హసన్ కూడా ఇష్టమే నాకు..అందుకే ఈ సినిమా కోసం చాలా ఎదురుచూసాను. రిలీజ్ అయిన రోజే ఫ్రెండ్స్ అందరూ చాలా బాగుంది అని చెప్పగానే సంతోషించాను. కానీ మొదటి వారం టికెట్స్ దొరకలేదు. పోయిన శనివారం వెళ్లి చూసొచ్చాను. Reviews చదవక పోయినా కొంచెం ఎక్కువ expectations పెట్టుకునే వెళ్లాను. సినిమా చాలా బాగుంది అని చెప్పలేను కానీ నాకు నచ్చింది. హిందీ సినిమా దబాంగ్ నుండి remake చేసినా ఎక్కడా ఆ ఫీలింగ్ రానివ్వలేదు..నేను దబాంగ్ చూసినా కూడా నాకు అలా అనిపించలేదంటే డైరెక్ట్ గా తెలుగు సినిమా చూసిన వాళ్లకి అయితే ఇక ఇది straight సినిమానే అనిపిస్తుందేమో. కథలో చాలానే మార్పులు చేసారు. లాజిక్ ని పక్కన పెడితే బాగా ఎంజాయ్ చేయొచ్చు.

తిక్క పోలీసు ఆఫీసర్ రోల్ పవన్ కళ్యాణ్ తను తప్ప వేరెవరూ చేయలేరు అన్నంత బాగా చేసాడు. ఈ సినిమా అంతా కూడా హీరో attitude చుట్టూనే తిరుగుతుంది. PK energy అంతా కనిపిస్తుంది ప్రతి సన్నివేశంలో (పంజా లో ఇది టోటల్ గా మిస్సింగ్).శ్రీకాకుళం యాస లో పలికే dialogues అయితే భలే బాగున్నాయి (పదేళ్ళ క్రితం వచ్చిన ఖుషి ని గుర్తుచేశాయి). శ్రుతి decent గా వుంది. ఆ అమ్మాయి పక్కన గాయత్రి (హ్యాపీ డేస్ లో అప్పు) చేసిన ఓవర్ ఆక్షన్ మాత్రం కొంచెం ఎబ్బెట్టుగా వుంది. అలీ, బ్రాహ్మి ఇద్దరూ ఓకే. మిగతా అందరూ వాళ్ళ వాళ్ళ roles కి తగ్గట్టు బాగానే చేసారు. టైటిల్ ఏదో catchy గా వుండాలని పెట్టినట్టు కాకుండా హీరో కి ఆ క్యారెక్టర్ పట్ల వున్న craze ని వీలయినన్ని సన్నివేశాల్లో చూపించి టైటిల్ కి న్యాయం చేసారు. సెకండ్ హాఫ్ లో వచ్చే అంత్యాక్షరి సీన్ కొంచెం ఓవర్ గా వున్నా కూడా సెన్స్ లెస్ కామెడీ ని ఎంజాయ్ చేయగలిగాను.

మ్యూజిక్ అయితే కెవ్వు కేక. పాటలన్నీ నచ్చాయి. నేను ముందుగా వినలేదు కూడా.మొదటి సారి స్క్రీన్ మీద చూస్తూ వినడమే. టైటిల్ సాంగ్, ఆకాశం అమ్మాయి అయితే, దిల్ సే పాటలు చాలా బాగున్నాయి. ఐటెం సాంగ్ మాత్రం కొంచెం ఎక్కువ ఊహించుకున్ననేమో నాకంతగా నచ్చలేదు.
మొత్తానికి పవన్ కళ్యాణ్ ఫాన్స్ కి పండగే. మిగతా వాళ్ళు కూడా ఒక్క సారి హ్యాపీ గా చూడగలరు.

దమ్ము

ఈ సినిమా చూడటమే ఒక వేస్ట్, ఇక దాని గురించి రాయటం పరమ దండగ. లాజిక్ లేని కథ, నేల విడిచి సాము చేసే హీరో,అతని చుట్టూ తిరుగుతూ వెకిలి వేషాలేసే హీరోయిన్ లు, రక్త పాతం, చీప్ కామెడీ, భారీ సెట్టింగ్స్ వెరసి ఈ సినిమా. నాకు తెలుగు హీరోల పాట్లు చూస్తుంటే జాలేస్తుంది. నిజంగా వాళ్ళు ఇలాంటి సినిమాలు ఇష్టపడే చేస్తున్నారా అనిపిస్తుంది. Jr NTR  మంచి నటుడు దాంట్లో తిరుగు లేదు. డాన్సులు, కామెడీ తో సహా నవరసాలు బాగా పండించగలడు. జనం అతన్ని ఇలాంటి మాస్ రోల్స్ లో చూడటానికి ఇష్టపడుతున్నారు కాబట్టి ఇలాంటివే చేయక తప్పదు :( నా లాంటి సినిమా పిచ్చోళ్ళు వేరే గతి లేక చూడకా తప్పదు.

పండు గాడిని మాత్రం ఇక ఇలాంటి సినిమాలకి తీసుకేళ్ళకూడదు అనుకుంటున్నాను. ఇప్పుడయితే వాడు theatre లోకి వెళ్ళగానే నిద్రపోతున్నాడు. కానీ కొంచెం ఊహ తెలిసాక చూడటం మొదలు పెడితే కష్టం కదా. అందుకే ముందు వాడిని తీసుకెళ్ళడం మానేసి మెల్లగా నేను కూడా ఇలాంటి సినిమాలకి వెళ్ళడం మానుకోవాలి.

లవ్లీ

రొటీన్ ప్రేమ కథా చిత్రమే ఇది. కాన్సెప్ట్ లో కొత్తదనం లేకపోయినా ఫస్ట్ హాఫ్ ఆహ్లాదంగా సాగుతుంది. సెకండ్ హాఫ్ లో రాజేంద్ర ప్రసాద్ వేసే వేషాలు కొంచెం విసుగు తెప్పిస్తాయి. ఆది పెర్ఫార్మన్స్ బాగుంది. డాన్సు లు బాగా చేస్తున్నాడు, చూడటానికి చక్కగా వున్నాడు. అయితే డైలాగ్ డెలివరీ లో మాత్రం ఇంకొంచెం కష్టపడాలి. తండ్రికి తగ్గ వారసుడు అనిపించుకోవాలంటే తప్పదు మరి . లవర్ బాయ్ ఇమేజ్ కి సరిగ్గా సరిపోతాడు. హీరోయిన్ నాకు నచ్చలేదు. వెన్నెల కిషోర్ రోల్ బాగా పండింది.

మరీ బోర్ కొడుతుంటే వెళ్లి చూడొచ్చు ఈ సినిమాని. మాకు పోయిన ఆదివారం చూడటానికి ఇంకేమీ సినిమాలు మిగలక దీనికి వెళ్లాం :)

మరి కొన్ని సినిమాలు..

ఈ మధ్య పూల రంగడు, ఈ రోజుల్లో, Agent వినోద్ చూసాను కానీ వాటి గురించి ఇక్కడ రాయలేదు. అందుకే ఈ పోస్ట్ లో ఒకేసారి లాగించేస్తున్నా :)

పూల రంగడు

అవుట్ n అవుట్ కామెడీ entertainer . సినిమా చూస్తున్నంత సేపూ 'మర్యాద రామన్న' కథలోని shades గుర్తొస్తుంటాయి. పాటలు రెండు మూడు పర్లేదు. సునీల్ ని కామెడీ హీరో గా అయితే చూడగలిగాను కానీ సీరియస్ fight లో, అదీ సిక్స్ ప్యాక్ తో అస్సలు భరించలేకపోయాను. హీరోయిన్ జస్ట్ ఓకే. ఎలాంటి expectations పెట్టుకోకుండా లాజిక్ గురించి ఆలోచించకుండా చూస్తే ఈ సినిమా నచ్చుతుంది.

Agent వినోద్

బాండ్ సినిమాల నుండి inspire అయ్యి తీసిన ఈ మూవీ కూడా జస్ట్ average అనిపించింది నాకు. ఫాస్ట్ paced narration వలన కథ పూర్తిగా అర్ధం కాలేదు నాకు (తర్వాత నెట్ లో చదివాను) హీరో పర్లేదనిపించాడు. హీరో-హీరోయిన్ కి ఆన్-స్క్రీన్ రొమాన్స్ కి అసలు ఛాన్స్ ఇవ్వలేదు కానీ వాళ్ళ వాళ్ళ పాత్రల్లో బాగా నటించారు.. పాటలు పర్లేదు. Trailer లో కామెడీ సాంగ్ చూసి అలాంటి సినిమానే అనుకుని వెళ్లాను కానీ సీరియస్ మూవీ నే. సైఫ్ ని సీరియస్ రోల్ లో చూడటం బాగుంది. సినిమాలో బోల్డు దేశాలు చుట్టేశారు :) మొత్తానికి ఒక సారి చూడొచ్చు అంతే.

ఈ రోజుల్లో

సినిమాకి మంచి టాక్ రావడం తో మూడో వారం లో వెళ్లాం. నాకు నచ్చింది. కథ లో ఎం కొత్తదనం లేకపోయినా, narration బాగుంది. హీరో పక్కింటి అబ్బాయిలా వున్నాడు. హీరో లక్షణం ఒక్కటంటే ఒక్కటి కూడా కనిపించలేదు ఇతనిలో. బహుశా అదే ఈ రోల్ లో ఇతనికి ప్లస్ అయి వుంటుంది. హీరోయిన్ కి కొద్దిగా త్రిష పోలికలున్నాయి. తెలుగమ్మాయి అట. చక్కగా వుంది. హీరో-హీరోయిన్ ఇద్దరూ వారి వారి పాత్రల్లో ఒదిగిపోయి నటించారు. మ్యూజిక్ బాగుంది. "రింగ్ ట్రింగ్" పాట సరదాగా బాగుంది. ఫ్రెష్ ఫీల్ తో వుంది సినిమా అంతా. పెద్ద వాళ్లకి నచ్చకపోవచ్చు కానీ యూత్ కి బాగా నచ్చుతుంది. వాళ్ళని టార్గెట్ చేసుకుని తీసిన సినిమానే ఇది. మూడో వారం లో కూడా collections బాగున్నాయి.

రచ్చ

సినిమా అంటే కేవలం ప్రేక్షకుల entertainment కోసం తీసేది మాత్రమే కాదు వందలాది కుటుంబాలకి అన్నం పెట్టే అన్నపూర్ణ కూడా. కనుక ఇది మాస్ సినిమా, ఇది క్లాసు సినిమా, ఇది అవార్డు సినిమా అని ఎన్ని రకాలుగా విభజించి విమర్శలు చేసినా, పొగిడినా ఆఖరికి ఆ సినిమా వలన లాభాలోచ్చాయా లేదా అన్నదే ముఖ్యమయిపోతుంది. లాభం వస్తే హిట్, లేకపోతే ఫ్లాప్ అంతే. ఆ రకంగా చూస్తే రచ్చ ఖచ్చితమయిన హిట్ సినిమా నే. ఏ వర్గాన్ని అయితే టార్గెట్ చేసుకుని సినిమా తీసారో వాళ్లకి కావాల్సిన అన్ని హంగులూ వున్నాయి. ఈ రెండు వారాల్లో మరో భారీ సినిమా విడుదల లేనందున వసూళ్ళకి ఎలాంటి డోకా వుండదు.

కానీ, నాకు మాత్రం ఈ సినిమా నచ్చలేదు. తలనొప్పి కూడా వచ్చేసింది. రొటీన్ కథ, భారీ సెట్టింగ్స్, నేల విడిచి సాము చేసే హీరో, అతని గురించి కొన్ని భారీ dialogues , రబ్బర్ బొమ్మ లాంటి హీరోయిన్, కథకి వెన్నెముక లాంటి ఫ్లాష్ బ్యాక్ ఎపిసోడ్ వెరసి ఒక అవుట్ n అవుట్ మాస్ మసాలా entertainer . చరణ్ నటన బావుంది, అతని వాయిస్ నాకు బాగా నచ్చుతుంది. తమన్నా డాన్సు లు బాగా చేసింది. బదరీనాథ్ సినిమాలోనే చాలా బాగా చేసిందనుకున్నాను. కానీ ఇందులో ఇంకా చక్కగా చేసింది. పాటల్లో టైటిల్ సాంగ్ అన్నిటికంటే బాగా వచ్చింది. Remix సాంగ్ trailers లో చూసినంత బాగాలేదు. అప్పటి బప్పి లహరి మ్యూజిక్ కి తిరుగే లేదు. మిగతా పాటలు సో సో. కామెడీ ఆర్టిస్ట్స్ చాలామందే వున్నారు కానీ ఒక్క బ్రాహ్మి రోల్ మాత్రమే ఆకట్టుకుంటుంది. చరణ్ ఫాన్స్ కి మాత్రం పండగే. మిగతా వాళ్లకి మాత్రం వాళ్ళ వాళ్ళ tolerance లెవెల్స్ ని బట్టి సినిమా నచ్చుతుందా లేదా అనేది ఆధారపడి వుంటుంది :)

3

అదేమిటో నాకు కొన్నాళ్ళ గా తమిళ సినిమాలన్నా, అక్కడి హీరోలన్నా చాలా ఇష్టంగా ఉంటోంది. ఒకప్పుడు సూర్య ని మాత్రమే వెర్రిగా ఆరాధించే నేను ఇప్పుడు ఆర్య, ధనుష్, విక్రం, కార్తి ఎలా ఎవరి సినిమా అన్నా సరే ఎగురుకుంటూ వెళ్ళిపోతున్నాను. ధనుష్ సినిమాలు ఇంతకుముందు చూడలేదు కానీ ఇతని గురించి చాలా పత్రికల్లో మంచిగా చదివాను. కొలవెరి పాట కోసం కాదు కానీ ఈ అబ్బాయి సినిమా అనేసరికి '3 ' తప్పకుండా చూడాలనుకున్నాను. శ్రుతి కూడా నచ్చుతుంది నాకు. ఎలాంటి ఓవర్ ఆక్షన్ చేయకుండా చాలా natural గా , ప్రొఫెషనల్ లా నటిస్తుంది.

నన్నెంత మాత్రం నిరాశ పరచలేదు ఈ సినిమా. మొదటి సీన్ లోనే అర్ధమయిపోతుంది ఇది రెగ్యులర్ రొమాంటిక్ లవ్ స్టొరీ కాదు అని. అయితే అదే మూడ్ లో ప్రేక్షకులని ఎక్కువ సేపు ఉంచకుండా ఫ్లాష్ బ్యాక్ లోకి తీసుకెళ్ళిపోతుంది డైరెక్టర్. ఫస్ట్ హాఫ్ అంతా హీరో-హీరోయిన్ మధ్య చిగురించిన teenage ప్రేమ, చిన్న చిన్న అవాంతరాలతో వారి పెళ్లి ఇలాంటి వాటి మధ్య సాగుతుంది. ఇదంతా యూత్ కి తేలిగ్గా connect అవుతుంది. సెకండ్ హాఫ్ నుండి కథలో సీరియస్ ఎలిమెంట్ మొదలవుతుంది. చివరికి వచ్చేసరికి గుండెలు పిండేసే నటన తో ధనుష్ ఒక ఆట ఆడేసుకున్నాడు. హీరో-హీరోయిన్ ఇద్దరూ పోటి పడి నటించినా ఎక్కువ మార్కులు మాత్రం ధనుష్ కే. హీరోయిన్ మీద తనకి ఉన్న ప్రేమ, తనలోని లోపం ఈ రెండిటి మధ్య బాలన్స్ చేసుకోలేక సతమతమయిపోయే ఒక matured క్యారెక్టర్ లో జీవించేసాడు.

పాటల విషయానికొస్తే కొలవెరి పాట స్క్రీన్ మీద ఏమంత గొప్పగా లేదు. ముందుగా లీక్ అవకుండా ఉండి వుంటే బాగుండేదేమో. మిగతా పాటలు బాగున్నాయి. సెకండ్ హాఫ్ లో కొంచెం సాగ తీత లేకుండా వుంది వుంటే ఇంకా బాగుండేదేమో. మొత్తం మీద కమర్షియల్ గా హిట్ కాకపోవచ్చు కానీ మంచి సినిమా నే. ఒకసారి చూసేయ్యొచ్చు.

Mr .నూకయ్య

మనోజ్- సనా ఖాన్ ప్రేమించుకుంటారు. రాజా-కృతి కర్బందా ప్రేమించుకుని పెళ్లి చేసుకుంటారు. ఈ రెండు జంటల మధ్య ప్రేమ ఎలాంటిది, స్వతహాగా దొంగ అయిన మనోజ్ లో పరివర్తన ఎలా వస్తుంది అనేదే ఈ సినిమాలోని కథ.

ఈ కథ కొంచెం కొత్తగానే వుంది. కిడ్నాప్ డ్రామా మధ్య నడుస్తుంది సినిమా అంతా.బోర్ కొట్టకుండా రెండు గంటలు గడిచిపోతాయి. ఆఖరిలో ఊహించని ఒక ట్విస్ట్ చాలా బాగుంది. బ్రాహ్మి చిన్న రోల్ చేసాడు. వేరే ఎవరన్నా అయితే చాలా చిరాగ్గా వుంటుంది కానీ బ్రాహ్మి కాబట్టి భరించగాలిగాము ఆ క్యారెక్టర్ లో. సెకండ్ హాఫ్ లో వచ్చే మొదటి పాట (ఒకే ఒక జీవితం ) లోని సాహిత్యం చాలా బాగుంది. మిగతా పాటలు పర్వాలేదనిపించేలా వున్నాయి. టెక్నికల్ వాల్యూస్ , స్టంట్స్  ఈ సినిమాకి ప్లస్ అయ్యాయి మనోజ్ నటన తో పాటు. మొదటి సగం మాత్రం బాగా తీయలేదనిపించింది. సెకండ్ హాఫ్ బాగుంది.


మనోజ్ లో చాలా energy వుంది. సినిమా భారం అంతా అతనే మోసాడు చివరిదాకా. సనా ఖాన్ మర బొమ్మలా వుంది, నటన కి పెద్ద ఆస్కారం కూడా లేదు. కృతి కర్బందా తీన్ మార్ లో లాగానే ఇందులో కూడా హోం లీ క్యారెక్టర్ చేసింది. చాలా చక్కగా వుంది. మిగతా అందరూ పర్లేదు.

మనోజ్ చేసిన ఈ కొత్త ప్రయోగం మంచి ఫలితాన్ని ఇచ్చినట్టే వుంది. వీక్ డే అయినా కూడా హాల్ దాదాపు నిండింది.

నువ్వా- నేనా

గమ్యం లాంటి అసాధారణమయిన సినిమాలో జోడి కట్టి మనల్ని మెప్పించిన శర్వానంద్, అల్లరి నరేష్ ఈ సారి మళ్ళీ జోడి కట్టి కామెడీని ఎలా పండించారో చూడాలనుకుని ఈ సినిమాకి వెళ్లాను. చాలా బాగుంది అనో, అస్సలు బాగోలేదు అనో చెప్పలేను కానీ  ఎలాంటి expectations లేకుండా వెళ్తే ఒకసారి చూసి కొంచెం నవ్వుకుని వచ్చేయ్యొచ్చు.

కథ ఏమీ లేదు. ఇద్దరూ ఒకే అమ్మాయిని ప్రేమిస్తారు. ఆ అమ్మాయి కోసం ఒకరి పై ఒకరు ఎత్తుకు పై ఎత్తులు వేసుకుంటూ నవ్వుల్నీ పండించడానికి ప్రయత్నిస్తారు. ఆఖరికి గద్దలా మరొకడు ఆ అమ్మాయిని తన్నుకుపోతాడు. మధ్యలో బ్రహ్మానందం, కోవై సరళ ల కామెడీ. బ్రహ్మానందం కామెడీ బాగుంది కానీ కోవై సరళ మాత్రం ఎప్పటిలానే OA  చేసి విసిగిస్తుంది. నరేష్ కి ఇలాంటి రోల్ చేయటం చాలా ఈజీ. అతను బాగా చేసాడు. శర్వానంద్ ని ఇంతవరకూ సీరియస్ రోల్స్ లో చూసి ఇప్పుడు కామెడీ అంటే కొంచెం కొత్తగానే వుంది కానీ చెత్తగా మటుకు లేదు :) పర్వాలేదు అనిపించింది. ఇక శ్రియ లో చాలా ఓల్డ్ లుక్ వచ్చేసింది. పాటలు రెండు బాగున్నాయి, మిగతావి నచ్చలేదు.

హాల్ కి వెళ్లి చూడాల్సిందే అనదగిన సినిమా కాదు. ఇంకో మూడు, నాలుగు నెలల్లో ఎలానూ టీవీ లో వచ్చేస్తుంది. అప్పుడు చూసి నవ్వుకోవచ్చు.

ఇష్క్

సినీ రంగం లో పైకి ఎదగాలంటే టాలెంట్,కృషి తో పాటు కొంత ప్రాక్టికల్ థింకింగ్ కూడా వుండాలి. నేల విడిచి సాము చెయ్యడం అన్ని సార్లు కలిసి రాదు. నితిన్ విషయంలో గత పదేళ్లుగా ఊరిస్తున్న హిట్ ఈ ఇష్క్ సినిమా రూపంలో అతనికి దక్కింది. ఇందులో చిలిపిగా అల్లరి చేసే చలాకి కుర్రాడి పాత్రలో నితిన్ ఒదిగిపోయాడు. సిక్స్ ప్యాక్ కోసం శరీరాన్ని కష్టపెట్టడం వలన అనుకుంటా ఆ అలసట ముఖంలో కనిపిస్తుంది. అయితే ముఖంలో maturity వచ్చింది. నిత్య మీనన్ నటన గురించి ప్రత్యేకంగా చెప్పక్కర్లేదు. ఈ అమ్మాయి నటనలో చాలా పరిణీతి కనిపిస్తుంది. అజయ్ కి కూడా మంచి పాత్ర దక్కింది. మిగతా నటీ నటులు కూడా చక్కగా చేసారు. పాటలు రెండు, మూడు బాగున్నాయి. ఫోటోగ్రఫి కి మంచి మార్కులు పడతాయి.

కథలో కొత్తదనం ఏమీ లేకపోయినా ఒక్కో సీన్ జరిగే కొద్దీ ప్రేక్షకుడికి ఆసక్తి పెరుగుతుంది. ఇంటర్వల్ అయే అప్పటికి climax ని ఊహించగలం కానీ అక్కడికి కథ ఎలా చేరుకుంటుందో అన్న సస్పెన్స్ వుంటుంది. ఇక కామెడీ కూడా పెద్ద గొప్పగా లేకపోయినా పర్వాలేదనిపిస్తుంది. మొత్తానికి ఒక సారి చూసెయ్యొచ్చు :)

లవ్ ఫెయిల్యూర్

చిన్న చిన్న గొడవలతో విడిపోయిన ఒక ప్రేమ జంట కథ ఈ సినిమా. కథ కొత్తది కాకపోయినా నడిపించిన తీరు బాగుంది. అరుణ్, పార్వతి ఇద్దరూ ఇంజనీరింగ్ కాలేజీ లో చదువుతుంటారు. ఇద్దరి మధ్య మొదలయిన చిన్న పరిచయం ప్రేమగా మారుతుంది. తర్వాత కొన్ని చిన్న చిన్న గొడవలు, సర్దుబాట్లు అయ్యాక ఒక సారి అరుణ్ ప్రవర్తన వలన తీవ్రంగా మనస్తాపం చెందిన పార్వతి వాళ్ళ మధ్య వున్న ప్రేమని తెగతెంపులు చేసుకోవాలని అనుకుంటుంది. అయితే అరుణ్ కి తన తప్పేంటో అర్ధం అవదు. సినిమా మొదటి సగం అంతా ఆన్/ఆఫ్ flashback episodes లో అరుణ్ ప్రేక్షకులకి ఈ కథ చెప్తుంటాడు. వీళ్ళిద్దరి ప్రేమ కథ కి సమాంతరం గా పార్వతి తల్లి తండ్రుల ప్రేమ కథ నడుస్తూ వుంటుంది. ఇంటర్వల్ దాకా కొంచెం బోర్ కొట్టినా సెకండ్ హాఫ్ మాత్రం ఆకట్టుకుంటుంది. అరుణ్ ఫ్రెండ్స్ తో వచ్చే సన్నివేశాలు, పార్వతి తల్లి తండ్రుల మధ్య జరిగే సంఘటనలు బాగా వచ్చాయి. చివరికి కథ సుఖాంతమవుతుంది.

సిద్ధార్థ్ చాలా రోజుల తర్వాత మంచి సినిమా సెలెక్ట్ చేసుకున్నాడు.అతనికి ఇలాంటి రోల్ చెయ్యడం వెన్నతో పెట్టిన విద్య. అమల పాల్ పక్కింటి అమ్మాయిలా అనిపించింది. నటన కూడా పర్వాలేదు. సురేఖ వాణి, సురేష్, ఇంకా మిగతా పాత్రధారులు కూడా చక్కగా నటించారు. పాటలు మాత్రం నాకు పెద్దగా నచ్చలేదు. ఫోటోగ్రఫి బాగుంది. ఎలాంటి expectations పెట్టుకోకుండా వెళ్తే బాగానే అనిపిస్తుంది ఈ సినిమా. మౌత్ టాక్ బాగా వుంది. పబ్లిసిటీ పట్ల ఇంకొంచెం శ్రద్ధ తీసుకుని వుంటే బాగుండేది.

బాడీగార్డ్

ఈ సినిమా హిందీ వెర్షన్ చూసాను నేను, అయినా మన తెలుగులో సినిమా ఎలా వుంటుందో అని వెళ్లాను. వెంకటేష్ నాకు emotional , యాక్షన్ ఎపిసోడ్స్ లో నచ్చుతాడు కానీ కామెడీ సన్నివేశాల్లో మాత్రం ఈ మధ్య అస్సలు నచ్చట్లేదు. ఈ సినిమాలో 50  ఏళ్ళ వయసున్న వెంకటేష్ ఆడవేషం వేసుకుని లేడీస్ హాస్టల్ లో దూరే సన్నివేశాన్ని అస్సలు భరించలేకపోయాను.కామెడీ చెయ్యాలంటే వెకిలి వేషాలే వెయ్యాలా? భలే చిరాకొచ్చేసింది. కథ లో దమ్ముందన్న విషయం అందరికీ తెల్సిందే. ఒక పరిణితి చెందిన ప్రేమ కథ ని ఎన్ని భాషల్లో తీసిన ప్రేక్షకులు ఆదరిస్తారన్న విషయం ఈ సినిమా నిరూపించింది. త్రిష, సలోని ఇద్దరూ బాగా చేసారు. వేణు మాధవ్ కామెడీ పర్లేదు, అలీ సో సో గా వున్నాడు. రెండు పాటల్లో locations బాగున్నాయి. తమన్ మ్యూజిక్ ఓకే. ఇంకేముంది చెప్పడానికి? స్టొరీ అదే మక్కి కి మక్కి తీసేశారు. నాకయితే హిందీ లో చూడటం వలన, వెంకి కామెడీ నచ్చకపోడం వలన బోర్ కొట్టింది. అందరికీ అలా ఉండకపోవచ్చు. వేరే భాషల్లో చూసి ఉండకపోతే మాత్రం ఒక సారి తప్పకుండా చూసెయ్యొచ్చు.

బిజినెస్ (బీప్) మేన్

ఇప్పటి తెలుగు సినిమాల్లో హీరోలంటే సకల అవలక్షణాలు ఉన్నవాళ్ళన్న అభిప్రాయం కలుగుతోంది. ఎన్ని చెత్త, తల తిక్క పనులు చేస్తే అంత గొప్పగా చూపిస్తున్నారు. ఈ సినిమా కూడా ఒక రకంగా అలానే వుంది. ఇక పూరి జగన్నాథ్ గత సినిమాల లాగానే ఇది కూడా మాఫియా - gangsters నేపధ్యంలో నడుస్తుంది. అందులో పెద్ద వింత ఏమీ లేదు కానీ మహేష్ బాబు ఈ సినిమా ఎలా చేసాడా అన్నది నాకిప్పటికీ అర్ధం కాలేదు. ఫ్యామిలీ audience దగ్గర మంచి impression కొట్టేసిన MB  ఇలాంటి సినిమా ఎందుకు చేసాడో. సినిమా అంతా బీప్ లే. ఏమన్నా అంటే మేము బయట ప్రపంచంలో జరిగేదే, మాట్లాడేదే  చూపించాము అంటారు. నిజమే బయట అలానే వుంటున్నారు gangsters , కానీ అలాంటి వాళ్ళని హీరో ని చేసి జనాలకి చూపిస్తే ఎలా అర్ధం చేసుకోవాలి? మనకి అందుబాటులో ఉండి మనల్ని బాగా influence చేసే మాధ్యమాల్లో సినిమా ఒకటి. హీరోలని దేవుళ్ళ లా పూజించే అభిమానులు వున్నారు. సినిమాల ద్వారా మంచిని చెప్పకపోయినా పర్వాలేదు కానీ చెడు ని గొప్పగా చూపించడం తప్పు అనిపిస్తుంది నాకు.

ఇక సినిమా లో ఎలాంటి లాజిక్ వుండదు. మనం ఆశించకూడదు కూడా. పాటలు మొదటి మూడు బాగానే వున్నాయి కానీ సెకండ్-హాఫ్ లో వచ్చినవి నాకు నచ్చలేదు. Dialogues కొన్ని బాగున్నాయి. కాజల్ ఏమంత అందంగా లేదు.ఆ మాటకొస్తే నాకు మహేష్ బాబు కూడా అందంగా కనిపించలేదు (దూకుడు లో ఇంకా బాగున్నాడు). ఇందులో రోల్ కి కావాల్సిన లుక్ కోసం అలా కనిపించి ఉంటాడు.

పూరి జగన్నాథ్ రామ్ గోపాల్ వర్మ ని చూసి బాగా inspire అవుతున్నట్టున్నాడు. కానీ ఆయన సినిమాల్లో ఉండే బిగువయిన కధనం (అన్ని సినిమాల్లో కాదు ), artists హావభావాలు (ఒక్క మహేష్ బాబు వి తప్ప ), సన్నివేశాన్ని బాగా elevate చేయగలిగే నేపధ్య సంగీతం ఇవేమీ ఇందులో లేవు. కేవలం సంభాషణలతోనే సినిమా మొత్తం నడిపించాలంటే కష్టం.

సినిమాకి వచ్చిన పాజిటివ్ టాక్ చూసి నేను ఇలా ఉంటుందని అస్సలు ఊహించకపోవడం తో కొంచెం ఎక్కువ నిరాశ చెందాను. మహేష్ బాబు ఫాన్స్, అదీ యూత్ కి అయితేనే నచ్చుతుందేమో ఈ సినిమా. నేనయితే 101 డిగ్రీల జ్వరంతో ఈ సినిమాకి వెళ్లాను, మహేష్ బాబు సినిమా అని. ఏ రవి తేజో అయితే కొంచెం digest చేసుకోగలిగే దాన్నేమో కానీ మహేష్ బాబు ని ఇలా చూడలేకపోయాను. సినిమా నచ్చకపోయినా ఎక్కడా బోర్ కొట్టలేదు. అదొక్కటే ఇందులో నాకు కనిపించిన పాజిటివ్ పాయింట్ :)